Новости
Новости
«ПАЧУЦЬ ДУМКУ КОЖНАГА». Дэпутат Палаты прадстаўнікоў Нацыянальнага сходу Рэспублікі Беларусь Іван Мамайка прапануе арганізаваць дыскусійную пляцоўку
Пра
гэта парламентарый расказаў рэдакцыі газеты, падводзячы вынікі сваёй нядаўняй
прамой тэлефоннай лініі ў Стоўбцах.
Акрамя тэлефанаванняў, адна з выбаршчыц
асабіста звярнулася да дэпутата.
– Усяго звярнуліся сем чалавек, усе – з
рознымі пытаннямі. Добрыя пачуцці выклікае тое, што былі закрануты не толькі
нейкія асабістыя турботы, але і грамадскія, якія хвалююць многіх жыхароў
Стаўбцоўшчыны, – падвёў вынік Іван Мамайка.
–
Якія з гэтых сітуацый патрабуюць мер рэагавання?
– Патрэбна рэагаваць на тое, каб
арганізаваць бяспечны дарожны рух у раёне СШ № 2 г. Стоўбцы. Паводле слоў грамадзяніна,
які звярнуўся, у вячэрні час там складваецца не зусім нармальная сітуацыя для
школьнікаў. Будзем разбірацца, высвятляць гэта пытанне з удзелам раённай
камісіі па бяспецы дарожнага руху.
Былі і іншыя звароты, якія патрабуюць змен
у заканадаўстве. Іх трэба асэнсаваць, абагуліць. У прыватнасці, тэлефанаваў
грамадзянін, які хоча атрымаць беларускае грамадзянства, але пры гэтым не
страціць грамадзянства Расійскай Федэрацыі, дзе ён, этнічны беларус, усё жыццё
працаваў. Ён слушна заўважае, што жывем мы ў Саюзнай дзяржаве, і заканадаўства
ў падобных выпадках павінна прадугледжваць магчымасць двайнога грамадзянства.
Дарэчы, гэта не першы такі зварот да мяне. Буду выкарыстоўваць сваё права
заканадаўчай ініцыятывы, каб унесці ў закон адпаведныя змяненні.
Таксама ўзнімаліся пытанні, якія звязаны з
будаўніцтвам жылля, добраўпарадкаваннем дарог.
–
Іван Андрэевіч, нельга абыйсці ўвагай будаўніцтва і ўладкаванне тых адносін,
якія склаліся сёння паміж дзяржавай і часткай «задаволеных» грамадзян.
– Праз газету я ўжо звяртаўся да
выбаршчыкаў. Мая пазіцыя нязменная: усе супярэчнасці і спрэчныя пытанні трэба
вырашаць у канструктыўным рэчышчы, шляхам дыялогу. З гэтай мэтай у кастрычніку
я планую зладзіць дыскусійную пляцоўку наконт змяненняў у Канстытуцыю Рэспублікі
Беларусь, якія паслужаць далейшаму развіццю нашай краіны.
Для мяне важна пачуць думку выбаршчыкаў,
каб на яе аснове выпрацаваць дэпутацкія прапановы. Яны, у сваю чаргу, будуць
разглядацца спецыяльнай камісіяй, выносіцца на абмеркаванне на Усебеларускі
народны сход, рэферэндум.
–
Як будзе праходзіць дыскусійная пляцоўка?
– Мяркую, што на ёй павінны быць
прадстаўлены шырокія слаі нашага грамадства, зацікаўленыя ў захаванні
суверэнітэту, незалежнасці Беларусі. Дыскусійная пляцоўка пройдзе ў Стоўбцах, а
менавіта ў цэнтры Стаўбцоўскай выбарчай акругі. А ўвогуле свае прапановы па
змяненні заканадаўства, Канстытуцыі можна накіроўваць у пісьмовай форме мне або
майму памочніку.
–
На цяперашні момант у некаторых акругах распачата кампанія адклікання дэпутатаў
парламента, і ў якасці асноўнай прычыны называецца страта сувязі са сваімі
выбаршчыкамі. Што вы можаце сказаць наконт гэтага?
– Сувязь дэпутата са сваімі выбаршчыкамі –
абавязковая ўмова яго дзейнасці. Асабіста я ішоў у парламент не ад партыі, а
менавіта ад выбарчай акругі. Кожны месяц я сустракаюся з выбаршчыкамі, наведваю
працоўныя калектывы. Да мяне можна прыйсці на прыём, можна накіраваць афіцыйны
зварот.
Тыя некалькі чалавек, якія кідаюць
вулічныя заклікі і бяруць на сябе ролю медыятараў паміж рознымі часткамі
грамадства, да мяне напрамую не звярталіся, каб, да прыкладу, правесці
грамадскую прыёмную і абмеркаваць тыя ці іншыя пытанні. Я гатовы да дыялогу са
сваімі выбаршчыкамі, які б пункт погляду яны не мелі.
Гутарыла Таццяна ПЯТКЕВІЧ, фота аўтара
